Düşənbədə Azərbaycanın dövlət müstəqilliyinin bərpasının 30-cu ildönümü ilə əlaqədar tədbir keçirilib
Düşənbədə Azərbaycanın dövlət müstəqilliyinin bərpasının 30-cu ildönümü ilə əlaqədar tədbir keçirilib.
Azərbaycanın Tacikistandakı Səfirliyindən Trend-ə verilən məlumata görə, bununla əlaqədar səfir Əlimirzamin Əskərovun iştirakı ilə Düşənbədə Tacikistanın aparıcı media nümayəndələri üçün nahar təşkil edilib.
Səfir Əlimirzamin Əskərov qonaqları Azərbaycan Respublikasının müstəqilliyinin bərpa olunması, habelə 44 günlük Vətən Müharibəsi və işğaldan azad edilmiş torpaqlarımızda aparılan quruculuq işləri barədə məlumatlandırıb.
Tədbir zamanı, həmçinin Azərbaycan-Tacikistan münasibətlərinə dair fikir mübadiləsi aparılmış, Tacikistanın media qurumları ilə ölkəmizin aidiyyəti media orqanları arasında əməkdaşlıq perspektivlərindən bəhs edilib, Tacikistanda fəaliyyət göstərən televiziya kanalları və elektron informasiya portallarında ölkəmizlə bağlı süjet və materialların yayımı imkanları müzakirə edilib.
Daha sonra səfir tacik jurnalistlərin suallarını cavablandırıb.
